Klassískar sörur

Krem

• Best er að byrja á því að gera kremið og kæla það svo á meðan þið gerið marengsinn. 
• Gott er að kveikja á ofninum í 180 gráðu hita og setja smjörpappír á tvær bökunarplötur.
• Setjið vatn og sykur saman í pott yfir meðal háan hita og látið suðuna koma upp. Hrærið af og til, þetta tekur ca, 5-7 mínútur og þykknar og verður að sírópi þegar það kólnar.
• Takið pottinn af og kælið sírópið.
• Þeytið eggjarauður þar til þær verða ljósar.
• Bætið sírópinu rólega saman við og hrærið á meðan.
• Bætið smjörinu saman við, en mikilvægt er að smjörið sé við stofuhita.
• Hrærið þar til kremið er orðið slétt og fínt.
• Blandið kakói saman við ásamt skyndikaffi, gott er að mylja kaffið aðeins svo það verði fínna.
• Hrærið þar til allt hefur blandast vel saman og kremið er slétt og fínt.
• Setjið kremið inn í ísskáp á meðan þið bakið marengsinn.

Marengs

• Hrærið eggjahvíturnar þar til þær freyða.
• Blandið flórsykri hægt og rólega saman við og hrærið þar til marengsinn verður stífur og stendur.
• Setjið möndludropa saman við og hrærið vel.
• Hakkið möndlurnar þar til þær verða fínt malaðar, blandið þeim saman við og hrærið rólega með sleif þar til allt hefur blandast vel saman.
• Hægt er að nota tvær skeiðar og setja um 1 msk. í hverja köku á smjörpappír. Mér finnst best að setja hringlaga stút í sprautupoka eða klippa stórt gat á sprautupoka og setja marengsinn ofan í pokann og sprauta honum á plöturnar. Þannig verða þær fallegar í laginu og allar jafn stórar.
• Bakið kökurnar við 180 gráðu hita í 10-12 mínútur.
• Kælið kökurnar alveg áður en þið setjið kremið á þær.
• Setjið kremið á kökurnar. Ég set kremið á þá hlið sem snýr upp þegar ég tek þær út úr ofninum því þá standa þær svo vel. Gott er að setja 1-2 tsk af kremi, eða meira fyrir þá sem vilja.
• Mér finnst best að setja kremið einnig í sprautupoka og klippa stórt gat, sprauta svo kremi á hverja köku fyrir sig og slétta svo úr því með skeið eða spaða. Kælið kökurnar í stutta stund og undirbúið súkkulaðið.

Súkkulaðihjúpur

• Setjið súkkulaðið í skál ásamt olíunni og setjið inn í örbylgju í um 30 sek. Gott er að hræra á milli og hita þar til súkkulaðið hefur náð að bráðna alveg.
• Dýfið hverri köku ofan í súkkulaðið.
• Geymið kökurnar í kæli eða frysti.

Höfundur: Thelma Þorbergsdóttir