Marengs með lakkríssósu og súkkulaðirjóma
Það er ekki veisla nema að það sé ein marengskaka á veisluborðinu. Þessar gömlu góðu standa alltaf fyrir sínu og sumir vilja aldrei bregða út af vananum, en það er líka gaman að koma bragðlaukum fólks á óvart með einhverjum nýjungum.
Innihald
12 skammtar
Marengsbotn:
| 3 stk. | eggjahvítur |
| 180 g | sykur |
| 1⁄2 tsk. | lyftiduft |
| 70 g | Rice Krispies |
Lakkríssósa:
| 1 poki | Bingókúlur |
| 100 g | suðusúkkulaði |
| 1⁄2 dl | rjómi frá Gott í matinn |
Toppur:
| 1⁄2 l | rjómi frá Gott í matinn |
| 2 msk. | kakó |
| 2 msk. | flórsykur |
| 1 kassi | hraunbitar |
| 250 g | jarðarber |
Marengs
- Hitið ofninn í 150°C (með blæstri) og setjið smjörpappír á bökunarplötu.
- Þeytið eggjahvítur og sykur saman þar til marengsinn verður stífur og stendur.
- Setjið lyftiduft saman við og hrærið vel.
- Blandið Rice Krispies saman við og hrærið léttilega með sleif þar til allt hefur blandast vel saman.
- Myndið hring á bökunarpappírinn, gott er að nota hringlótt kökuform til að móta marengsinn eftir.
- Setjið marengsinn á formið og bakið í um það bil 50 mín. eða þar til marengsinn er þurr viðkomu.
- Kælið marengsinn alveg áður en þið takið hann af bökunarplötunni svo hann brotni ekki, setjið á botninn kaldan.
- Það er í góðu lagi að baka marengsbotn nokkrum dögum áður en setja á ofan á hann svo lengi sem hann er geymdur vel t.d. inni í ofni.
Lakkríssósa
- Setjið Bingókúlur, súkkulaði og rjóma saman í pott yfir lágum hita og hrærið þar til allt hefur bráðnað og blandast vel saman.
- Setjið helming sósunnar á marengsbotninn og setjið afganginn svo ofan á kökuna.
Toppur
- Þeytið rjóma þar til hann verður stífur og stendur, passið þó að þeyta hann ekki of mikið.
- Sigtið 2 msk. af kakói ofan í rjómann og hrærið varlega saman með sleif ásamt flórsykrinum.
- Setjið rjómann ofan á botninn.
- Grófsaxið hraunbita og jarðarber og setjið ofan á.
- Setjið restina af lakkríssósunni ofan á kökuna.
- Geymið í kæli þar til kakan er borin fram.
Höfundur: Thelma Þorbergsdóttir